Ադրբեջանի փոխվարչապետը Հայաստանի վերաբերյալ հայտարարություն է արել

Ադրբեջանի փոխվարչապետ Շահին Մուստաֆաևը հայտնել է, որ Ռուսաստանից Հայաստան Ադրբեջանի տարածքով տարանցիկ եղանակով արդեն տեղափոխվել է շուրջ 26 հազար տոննա բեռ։

Նրա խոսքով՝ փոխադրված բեռների գերակշիռ մասը հացահատիկն ու պարարտանյութերն են։ Ըստ նրա՝ այս գործընթացը նպատակ ունի զարգացնել տրանսպորտային-լոգիստիկ համագործակցությունն ու ամրապնդել վստահությունը տարածաշրջանում։

Փոխվարչապետի պնդմամբ՝ «Հյուսիս-Հարավ» միջազգային տրանսպորտային միջանցքը գործում է հուսալիորեն՝ ապահովելով անխափան բեռնաշրջանառություն նույնիսկ բարձր անկայունության պայմաններում։ Մուստաֆաևը շեշտել է, որ իրականացվում են ակտիվ աշխատանքներ միջանցքի թվայնացման ուղղությամբ, ինչը կնպաստի ողջ երթուղով լոգիստիկ գործընթացների արագացմանը։

Նա նաև տեղեկացրել է, որ 2026 թվականի առաջին երկու ամիսներին արձանագրվել է դրական դինամիկա. տարանցիկ փոխադրումների ծավալներն աճել են 23%-ով։ Մասնավորապես, երկաթուղային փոխադրումների աճը կազմել է 61%, իսկ ավտոմոբիլայինինը՝ 13%։ Փոխվարչապետը հավելել է, որ Ադրբեջանը լիովին կատարում է միջկառավարական համաձայնագրով ստանձնած իր պարտավորությունները։