Փոխհատուցում՝ «Եռաբլուրում» հուղարկավորվածների ընտանիքներին

Կառավարությունը ապրիլի 9-ի նիստում որոշել է փոխհատուցում տրամադրել 2023 թվականի սեպտեմբերի 19–20-ին հակառակորդի նախահարձակ գործողության հետևանքով զոհված և «Եռաբլուր» զինվորական պանթեոնում հուղարկավորված անձանց 8 ընտանիքների։

Փոխհատուցումը կտրամադրվի այն ընտանիքներին, որոնք իրենց միջոցներով և նախընտրած ձևով պատրաստել ու տեղադրել են շիրմաքարերի լրակազմերը կամ տապանաքարերը։

Նախնական հաշվարկներով փոխհատուցման չափը կկազմի շուրջ 10 մլն դրամ։

«Դրամական հատուցում տրամադրելու վերաբերյալ առաջարկը պայմանավորված է նաև այն հանգամանքով, որ եթե անգամ ընտանիքներն իրենց ցանկացած ձևով չբարեկարգեին գերեզմանները, այն պետք է իրականացվեր պետության կողմից և ծախսվեր գրեթե նույն գումարը»,– նշված է որոշման հիմնավորման մեջ։

Կառավարությունից հայտնում են նաև, որ նախապես նախատեսված, սակայն չօգտագործված և պահեստավորված տապանաքարերը կտրամադրվեն նոր հուղարկավորված զինծառայողների գերեզմանների բարեկարգման համար։