Թրամփը սպառնացել է Իրանին զենք մատակարարող երկրներին

ԱՄՆ նախագահ Դոնալդ Թրամփը հայտարարել է, որ Իրանին ռազմական տեխնիկա մատակարարող ցանկացած երկիր կբախվի 50% մաքսատուրքերի կիրառման հետ։ Հայտարարությունը նա հրապարակել է իր Truth Social սոցիալական հարթակում՝ ընդգծելով, որ միջոցը կգործի անմիջապես և առանց բացառությունների։ 

Թրամփի խոսքով՝ սահմանափակումները կվերաբերեն այդ երկրների կողմից ԱՄՆ արտահանվող բոլոր ապրանքներին։ Նրա ձևակերպմամբ՝ այս քայլը ուղղված է Իրանի ռազմական ներուժի սահմանափակմանը։

Նախկինում ԱՄՆ նախագահը նշել էր, որ Վաշինգտոնը պատրաստ է վերականգնել հարվածները Իրանի դեմ, եթե Թեհրանի հետ անհրաժեշտ համաձայնություն ձեռք չբերվի։ Միևնույն ժամանակ, նա չէր բացառել նաև բանակցությունների շարունակությունը՝ նշելով, որ քննարկվում են սակագների և պատժամիջոցների մեղմացման հնարավորությունները։

Ավելի վաղ հաղորդվել էր, որ ԱՄՆ-ն ու Իրանը համաձայնության են եկել երկշաբաթյա հրադադարի շուրջ։ Թրամփի տվյալներով՝ Իրանը ներկայացրել է 10 կետից բաղկացած առաջարկ, որը կարող է հիմք ծառայել հետագա բանակցությունների համար։