Իրանում կործանիչի խոցման ժամանակ ամերիկացի զինվորականներ են վիրավորվել

Իրանում անցած շաբաթվա վերջում տեղի ունեցած միջադեպի հետևանքով, որի ընթացքում խոցվել էր ԱՄՆ ռազմաօդային ուժերի F-15E կործանիչը, վիրավորվել են երեք ամերիկացի զինծառայող։ Այդ մասին Associated Press-ին անանունության պայմանով հայտնել է ամերիկացի պաշտոնյան։

Աղբյուրի փոխանցմամբ՝ վիրավորում է ստացել խոցված ինքնաթիռի սպառազինության համակարգերի սպան, ինչպես նաև ուղղաթիռի անձնակազմի երկու անդամներ։ Նրանցից վերջիններս տուժել են այն պահին, երբ մասնակցել են օդաչուի նախնական տարհանման գործողությանը և հայտնվել կրակի տակ։

Սպիտակ տանը կայացած ճեպազրույցում ԱՄՆ ԶՈՒ շտաբերի պետերի միացյալ կոմիտեի նախագահ գեներալ Դեն Քեյնը հայտարարել է, որ օդաչուի փրկությունից հետո HH-60 Jolly Green II ուղղաթիռները ենթարկվել են հրաձգային կրակի։ Նրա խոսքով՝ երկրորդը ընթացող ուղղաթիռը մի քանի հարված է ստացել։

Նույն ճեպազրույցում նախագահ Դոնալդ Թրամփը հայտնել է, որ խոցված կործանիչի սպառազինության համակարգերի սպան ծանր արյունահոսություն է ունեցել, սակայն, այդուհանդերձ, կարողացել է բարձրանալ լեռնային տեղանքով և փոխանցել իր գտնվելու վայրի տվյալները։ Հաղորդված տեղեկությունները ներկայացվել են պաշտոնական հայտարարությունների և ամերիկյան կողմի աղբյուրների հղմամբ։