Թրամփը սպառնացել է ՆԱՏՕ-ին

Հյուսիսատլանտյան դաշինքին շատ վատ ապագա է սպասում, եթե անդամ պետությունները չօգնեն Միացյալ Նահանգներին Հորմուզի նեղուցի ապաշրջափակման գործում, հայտարարել է ԱՄՆ նախագահ Դոնալդ Թրամփը բրիտանական Financial Times թերթին տված հարցազրույցում։

«Եթե Հորմուզի նեղուցում ջանքերին միանալու կոչին արձագանք չլինի, կամ եթե բացասական արձագանք լինի, ապա կարծում եմ, որ դա շատ վատ ազդեցություն կունենա ՆԱՏՕ-ի ապագայի վրա», - ասել է Սպիտակ տան ղեկավարը։

«Մենք ունենք մի բան, որը կոչվում է ՆԱՏՕ։ Մենք շատ բարի ենք եղել։ Մենք չպետք է օգնեինք նրանց Ուկրաինայի հարցում։ Ուկրաինան հազարավոր կիլոմետրեր հեռավորության վրա է։ Բայց մենք օգնեցինք։ Հիմա կտեսնենք՝ նրանք կօգնեն մեզ, թե ոչ։ Որովհետև ես վաղուց եմ ասում, որ մենք պատրաստ ենք օգնել նրանց, բայց նրանք պատրաստ չեն մեզ հետ լինել», - ասել է Թրամփը։

Նա հավելել է, որ հետաքրքրված է ցանկացած տեսակի օգնությամբ, այդ թվում՝ տարածաշրջան ականազերծող նավեր ուղարկելով։ Ամերիկացի առաջնորդը նաև ակնարկեց, որ եվրոպական երկրների հատուկ նշանակության ուժերը կարող են օգտագործվել Պարսից ծոցում անօդաչու թռչող սարքեր արձակող կամ ականապատող իրանական ուժերին վերացնելու համար։

«Մենք նրանց շատ ուժեղ ենք հարվածում։ Նրանք ուրիշ ելք չունեն, քան նեղուցում մի փոքր խնդիրներ առաջացնելը, բայց այս մարդիկ օգտվում են Հորմուզի նեղուցում նավագնացությունից, և նրանք պետք է օգնեն մեզ պահպանել կարգուկանոնը», - ասել է Թրամփը։

Սպիտակ տան ղեկավարը շեշտել է, որ ՆԱՏՕ-ն չպետք է լինի «միակողմանի փողոց»։ Նա նաև պնդել է, որ դաշինքի անդամ երկրները նվազագույն ռիսկի կենթարկվեն, եթե ռազմանավեր ուղարկեն Հորմուզի նեղուց, քանի որ Իրանի ռազմական կարողությունները, իբր, արդյունավետորեն ոչնչացվել են։