Մարդատար թռիչք դեպի Լուսին՝ 50 տարվա դադարից հետո

NASA-ի «Արտեմիս II» լուսնային առաքելությունը կրկին վերադարձել է նախանշված ժամանակացույցին։ Վերջին երկու օրերին ծրագրի ղեկավարները անցկացրել են թռիչքից առաջ պատրաստվածության վերջնական ստուգումը, նախքան Space Launch System (SLS) հրթիռն ու Orion տիեզերանավը նորից կտեղափոխվեն արձակման հարթակ։

NASA-ի տվյալներով՝ հրթիռի դուրսբերումը նախատեսված է մարտի 19-ին, իսկ արձակումը հնարավոր է արդեն ապրիլի 1-ին։

Առաքելության մեկնարկը  նախատեսված էր ավելի վաղ, սակայն առաջին վառելիքալցման փորձարկման ընթացքում խնդիրներ էին առաջացել։ Փետրվարին անցկացված երկրորդ փորձը հաջող է անցել, բայց հետագա ստուգումները բացահայտել էին հելիումի մատակարարման խափանում հրթիռի վերին աստիճանում։

NASA-ում նշում են, որ խափանումն ամբողջությամբ վերացվել է, և երրորդ վառելիքալցման փորձարկում չի անցկացվի։ Հաջորդ լիցքավորումը պետք է կատարվի արդեն անմիջապես մեկնարկի օրը։ «Արտեմիս II»-ը կդառնա NASA-ի առաջին անձնակազմով թռիչքը դեպի Լուսին ավելի քան 50 տարվա ընդմիջումից հետո։ Եթե «Արտեմիս I»-ը 2022 թվականի նոյեմբերին առանց անձնակազմի փորձարկել էր Orion-ի համակարգերը, ապա նոր առաքելության գլխավոր նպատակը տիեզերանավի՝ հեռավոր տիեզերքում անձնակազմի անվտանգ աջակցման հնարավորության ստուգումն է։