Իսրայելի պաշտպանության նախարարը հանդես է եկել «կոշտ» հայտարարություններով

Իսրայելի պաշտպանության նախարար Իսրայել Կացը կոշտ հայտարարություններով է հանդես եկել Իրանի ղեկավարության հասցեին՝ անդրադառնալով տարածաշրջանում լարվածությանը։ Նրա խոսքով՝ Իրանի իշխանությունները «թաքնվում են թունելներում» և այնտեղից հրահանգներ են տալիս գործողությունների համար։

Կացի պնդմամբ՝ այդ հրահանգների շրջանակում իրականացվում են հարձակումներ Իսրայելի քաղաքացիական բնակչության և տարածաշրջանի այլ թիրախների ուղղությամբ։ Նա Իրանի ներկայիս ղեկավարության գործելաոճը համեմատել է ՀԱՄԱՍ շարժման կառավարման մեթոդների հետ։

Իսրայելի պաշտպանության նախարարը նաև հայտարարել է, որ Իրանում զոհերի թիվը կարող է մեծ լինել՝ նշելով, որ այդ տեղեկությունները, իր խոսքով, ամբողջությամբ չեն հրապարակվում, քանի որ երկրում սահմանափակվում է ինտերնետի հասանելիությունը։ Նրա խոսքով՝ որոշ տեղեկությունների համաձայն՝ հիվանդանոցների դիահերձարանները ծանրաբեռնված են։

Կացը ընդգծել է, որ Իսրայելը շարունակում է գործողությունները՝ թիրախավորելով, իր բնորոշմամբ, «ահաբեկչական ուժերը», այլ ոչ թե խաղաղ բնակչությանը։ Նա հավելել է, որ Իսրայելը շարունակելու է հարվածներ հասցնել Իրանի ռազմավարական օբյեկտներին Թեհրանում և երկրի այլ հատվածներում՝ նշելով նաև, որ Իրանի ներքին փոփոխությունները կախված են հենց իրանական հասարակությունից։