Ես Ադրբեջանի նախագահին շնորհակալ եմ նման որոշման համար․ Փաշինյան

Ութ ամիս է՝ Հայաստան-Ադրբեջան սահմանին լիարժեք խաղաղություն է հաստատված: 2025 թվականը մեր անկախությունից՝ 1991 թվականից ի վեր դարձավ առաջին օրացուցային տարին, երբ Հայաստան-Ադրբեջան հրաձգության հետևանքով ո՛չ զոհ է եղել, ո՛չ վիրավոր: Արդեն ամիսներ սահմանամերձ բնակավայրերի բնակիչները կրակոցների ձայներ չեն լսում: Անկախությունից ի վեր առաջին անգամ՝ 2025 թվականի նոյեմբերին, Ադրբեջանի տարածքով անցնելով, նաև անցնելով Վրաստանի միջով, գնացք եկավ Հայաստանի Հանրապետություն: Այդ մասին Եվրախորհրդարանում իր ելույթի ժամանակ ասել է վարչապետ Նիկոլ Փաշինյանը:

Սա տեղի ունեցավ այն բանից հետո, երբ, ըստ Փաշինյանի, 2025-ի հոկտեմբերին Ադրբեջանի նախագահը հայտարարել է, թե վերացնում է Ադրբեջանի տարածքով դեպի Հայաստան երկաթուղային փոխադրումների սահմանափակումները. «Ես Ադրբեջանի նախագահին շնորհակալ եմ նման որոշման համար»:

«Մենք էլ մեր հերթին հայտարարել ենք, թե հենց այսօր պատրաստ ենք ապահովել տարանցումն Ադրբեջանից դեպի Թուրքիա և հակառակ ուղղությամբ, որովհետև սա կարող ենք անել այս պահին մեր գործող ճանապարհներով:

Ո՛չ Ադրբեջանը, ո՛չ Թուրքիան այս հնարավորությունից դեռ չեն օգտվել: Ենթադրում եմ, որ նաև այն պատճառով, որ մտածում են, թե նման լուծումը գուցե բերի TRIPP նախագծի իրագործման ձգձգման:

Այս ամբիոնից պաշտոնապես հայտարարում եմ, որ ՀՀ-ն TRIPP նախագծի իրագործումը ձգձգելու ոչ միայն մտադրություն, այլև պատճառ չունի, որովհետև նախագիծը լիարժեք համապատասխանում է ՀՀ-ի կարճաժամկետ, միջնաժամկետ և երկարաժամկետ շահերին»,- հավելել է վարչապետ Նիկոլ Փաշինյանը: