Բանակցություններ ենք վարում Հնդկաստանի հետ. լավ ենք տրամադրված. Ռուսաստանի փոխվարչապետ

Ռուսաստանը դրական է վերաբերվում Եվրասիական տնտեսական միության (ԵԱՏՄ) երկրների և Հնդկաստանի միջև անցյալ տարի սկսված ազատ առևտրի համաձայնագրի շուրջ բանակցությունների հեռանկարներին, հայտարարել է Ռուսաստանի փոխվարչապետ Ալեքսեյ Օվերչուկը։

«Մենք այժմ բանակցություններ ենք վարում Հնդկաստանի հետ։ Առաջին փուլն անցել է, և մենք բավականին լավատեսորեն ենք տրամադրված։ Եթե համապատասխան համաձայնագիրը ստորագրվի Հնդկաստանի հետ, ռուսական բիզնեսը կունենա 2,2 միլիարդ բնակչություն ունեցող շուկա մուտք գործելու հնարավորություն», - ասել է նա՝ ելույթ ունենալով Ռուսաստանի արդյունաբերողների և ձեռներեցների միության (ՌՁՄ) Ռուսական գործարար շաբաթվա շրջանակներում Ինտեգրացիոն ֆորումում։

Փոխվարչապետի խոսքով՝ ԵԱՏՄ-ի շրջանակներում գործող արտոնյալ առևտրային համաձայնագրերը, ինչպես նաև Մոնղոլիայի, ԱՄԷ-ի և Ինդոնեզիայի հետ ստորագրված, բայց դեռևս ուժի մեջ չմտած ազատ առևտրի գոտու համաձայնագրերը (ԱԱԳ) ապահովում են արտաքին առևտրի ռուս մասնակիցների մուտքը մոտ 700 միլիոն բնակչություն ունեցող շուկա և ընդգրկում են Ռուսաստանի արտաքին առևտրի շրջանառության մոտ 20%-ը։ Այս տարվա սկզբին Օվերչուկը հույս էր հայտնել, որ ստորագրված ԱԱԳ համաձայնագրերը ուժի մեջ կմտնեն մինչև 2026 թվականի վերջը։