ԱՄՆ ԶՈՒ-ն պատրաստվում է Իրանի դեմ երկարատև գործողության. Reuters
ԱՄՆ զինված ուժերը պատրաստվում են Իրանի դեմ երկարատև ռազմական գործողության, եթե նախագահ Դոնալդ Թրամփը հրաման տա հարձակման, հաղորդում է Reuters-ը՝ հղում անելով ամերիկացի երկու պաշտոնյաների, որոնք ցանկացել են անանուն մնալ:
Հիշեցնենք, որ ԱՄՆ-ի և Իրանի միջև բանակցությունները տեղի կունենան Ժնևում փետրվարի 17-ին։ ԱՄՆ հատուկ ներկայացուցիչ Սթիվ Ուիտքոֆը և Թրամփի փեսան՝ Ջարեդ Քուշները, կհանդիպեն Թեհրանի ներկայացուցիչների հետ, իսկ Օմանի ներկայացուցիչները կհանդիսանան միջնորդներ։
Բանակցություններից առաջ ԱՄՆ պետքարտուղար Մարկո Ռուբիոն հայտարարել է, որ Թրամփը կնախընտրեր համաձայնության հասնել Իրանի հետ, բայց «դա շատ դժվար է անել»։
ԱՄՆ-ի նախագահը, իր հերթին, հիշատակել է փետրվարի 13-ին Իրանում կառավարության փոփոխության հնարավորությունը, նշելով, որ «դա, կարծես, լավագույն բանն է, որ կարող է տեղի ունենալ»։ Նա չի պատասխանել այն հարցին, թե ով կարող է ղեկավարել երկիրը, բայց ասել է, որ «կան նման մարդիկ»։
Հավելենք, որ վերջին ամիսներին ԱՄՆ-ն Մերձավոր Արևելք է ուղարկել երկու նավատորմ՝ USS Abraham Lincoln և USS Gerald R. Ford ավիակիրների գլխավորությամբ։ Բացի այդ, ըստ The Wall Street Journal-ի, մեկ այլ ավիակիր՝ USS George H.W. Bush-ը, հրաման է ստացել տեղակայվել Մերձավոր Արևելքում։
