Պեսկովը հանդես է եկել մի շարք հայտարարություններով

Կրեմլը հաստատել է, որ Ռուսաստանի և Ֆրանսիայի միջև վերականգնվել են շփումները տեխնիկական մակարդակում։ Այդ մասին հայտարարել է ՌԴ նախագահի մամուլի խոսնակ Դմիտրի Պեսկովը՝ պատասխանելով լրագրողների հարցերին։ Նրա խոսքով՝ այս փուլում Մոսկվան դեռ չի տեսնում հստակ ազդակներ Փարիզի կողմից՝ բարձր մակարդակով քաղաքական երկխոսություն սկսելու պատրաստակամության վերաբերյալ։

Միևնույն ժամանակ Կրեմլում ուշադրություն են դարձրել Ֆրանսիայի նախագահ Էմանուել Մակրոնի այն հայտարարություններին, որոնցում նա նշել է Ռուսաստանի հետ հարաբերությունները կարգավորելու անհրաժեշտությունը։ Պեսկովի խոսքով՝ նման մոտեցումները ընկալվում են դրական և համահունչ են Մոսկվայի դիրքորոշմանը, սակայն դրանց գործնական շարունակությունը դեռևս տեսանելի չէ։

Պեսկովը հայտնել է նաև, որ այս պահին չկան հստակ պայմանավորվածություններ կամ օրացույցային ժամկետներ Ռուսաստանի, Ուկրաինայի և ԱՄՆ-ի ներկայացուցիչների միջև հնարավոր հաջորդ բանակցությունների վերաբերյալ։ Նրա խոսքով՝ քննարկումները շարունակվում են տարբեր մակարդակներում, սակայն կոնկրետ որոշումներ դեռ չեն կայացվել։

Բացի այդ, Կրեմլում արձագանքել են Թուրքիայի արտաքին գործերի նախարարի հայտարարությանը՝ միջուկային սպառազինության մրցավազքին հնարավոր մասնակցության մասին։ ՌԴ նախագահի մամուլի խոսնակը շեշտել է, որ գործող միջուկային զենքի չտարածման ռեժիմը միջազգային անվտանգության հիմնարար տարրերից է, և բոլոր միջուկային պետությունները պարտավոր են ցուցաբերել պատասխանատու վարքագիծ՝ նման մրցավազքը բացառելու համար։