Ալեն Սիմոնյանը՝ գերիների հարցով շոշափելի արդյունքների մասին
ԱԺ նախագահ Ալեն Սիմոնյանը անդրադարձել է գերիների հարցին՝ պատասխանելով լրագրողի հարցին շոշափելի արդյունքների վերաբերյալ։
Անդրադառնալով ԱՄՆ փոխնախագահի՝ Հայաստան կատարած այցին և պատասխանելով լրագրողի հարցին՝ շոշափելի արդյունքներ կա՞ն գերիների հարցի հետ կապված, Ազգային ժողովի նախագահ Ալեն Սիմոնյանն ասել է․
«Հաճախ այդ հարցը տալիս եք, մենք ասում ենք՝ հրապարակային այդ մասին չենք խոսում, գործն արվում է, այդ ասածից հետո ինչ-որ քանակությամբ մարդիկ վերադառնում են ՀՀ: Որևիցե բան մարտավարության մեջ չի փոխվել»։
Ալեն Սիմոնյանը դրական է գնահատել Ադրբեջանի հետ որդեգրված աշխատելաոճը՝ անդրադառնալով գերիների հարցին։
«Շատ դրական եմ գնահատում այն աշխատելաոճը, որը մենք որդեգրել ենք Ադրբեջանի հետ: Կարծում եմ, եթե այս ճանապարհով շարունակենք առաջ ընթանալ, մեր երկու երկրները մոտ ապագայում այլևս խնդիր չեն ունենա»,- ասել է Սիմոնյանը:
