Էփշտեյնի մահվան փաստաթուղթը կազմվել է նրա մահից առաջ. Daily Mail

Ամերիկացի ֆինանսիստ Ջեֆրի Էփշտեյնի մահվան հետ կապված նոր մանրամասներ են հրապարակվել։ Daily Mail-ի փոխանցմամբ՝ նրա մահը հաստատող պաշտոնական փաստաթուղթը կազմվել է մեկ օր առաջ՝ մինչ Էփշտեյնի մահը Նյու Յորքի բանտում։

Հրապարակումը հղում է անում ԱՄՆ դատախազի՝ Մանհեթենի շրջանի նախկին ղեկավար Ջեֆրի Բերմանի 2019 թվականի օգոստոսի 9-ի հայտարարությանը։ Այդ փաստաթղթում նշվում է, որ նույն օրը առավոտյան Մանհեթենի ուղղիչ հիմնարկը տեղեկացրել է՝ Ջեֆրի Էփշտեյնը հայտնաբերվել է անգիտակից վիճակում իր խցում և կարճ ժամանակ անց ճանաչվել մահացած։

Հոդվածում ընդգծվում է, որ փաստաթղթի պատրաստման ամսաթիվը առաջ է ընկնում Էփշտեյնի մահվան պաշտոնապես հայտարարված օրվանից, ինչը նոր հարցեր է առաջացնում գործի ընթացքի և փաստաթղթաշրջանառության վերաբերյալ։ Միաժամանակ չի նշվում, թե դա տեխնիկական սխալ է եղել, թե ընթացակարգային առանձնահատկություն։

Պաշտոնական մարմինները հրապարակման պահին չեն ներկայացրել նոր պարզաբանումներ կամ մեկնաբանություններ փաստաթղթի ժամանակագրության վերաբերյալ։