Զելենսկին` Ուկրաինայի ԶՈւ Օդային ուժերում սպասվող կադրային փոփոխությունների մասին

Ուկրաինայի նախագահ Վլադիմիր Զելենսկին երեկոյան տեսաուղերձում հայտարարել է, որ Ուկրաինայի զինված ուժերի Օդային ուժերում նախատեսվում են կադրային փոփոխություններ։ Նրա խոսքով՝ այդ փոփոխությունները պայմանավորված են ռուսական հարվածային անօդաչուների, մասնավորապես «Շահեդների», դեմ պայքարի անհրաժեշտությամբ։

Զելենսկին ընդգծել է, որ փոքր հեռահարության հակաօդային պաշտպանության բաղադրիչը, որը կենտրոնացած է հարվածային դրոնների դեմ հակազդման վրա, պետք է գործի զգալիորեն ավելի արդյունավետ և չթույլատրի այն խնդիրները, որոնք ներկայումս առկա են։

«Պաշտպանական սահմանները որոշ ուղղություններում կառուցված են ավելի լավ, սակայն կան ուղղություններ, որտեղ դեռ անհրաժեշտ է աշխատել և բավականին լուրջ աշխատել»,- նշել է Ուկրաինայի նախագահը։

Նա հավելել է, որ իրավիճակի բարելավման համար անհրաժեշտ են ինչպես կազմակերպչական, այնպես էլ կադրային որոշումներ։