Օմանում մեկնարկել են իրանա-ամերիկյան բանակցությունները
Օմանում մեկնարկել են իրանա-ամերիկյան բանակցությունները, հայտնում են իրանական լրատվամիջոցները։ Իրանական պատվիրակությունը գլխավորում է արտաքին գործերի նախարար Աբբաս Արաղչին։ ԱՄՆ կողմից բանակցություններին մասնակցում են նախագահ Դոնալդ Թրամփի փեսա Ջարեդ Քուշները և նախագահի հատուկ ներկայացուցիչ Սթիվ Ուիթքոֆը։
Իրանի արտաքին գործերի նախարար Աբբաս Արաղչին, Օմանում ԱՄՆ-ի հետ նախատեսվող բանակցություններից առաջ, գրառում է կատարել X սոցիալական հարթակում։
«Իրանը դիվանագիտական բանակցություններին մոտենում է բաց աչքերով և անցյալ տարվա իրադարձությունները լավ հիշելով։ Մենք գործում ենք բարի կամքով և վճռականորեն պաշտպանում ենք մեր իրավունքները։
Պարտավորությունները պետք է կատարվեն։ Հավասար իրավունքները, փոխադարձ հարգանքը և փոխադարձ շահերը հռետորաբանություն չեն, այլ անհրաժեշտություն և երկարատև համաձայնագրի հիմք»,- նշել է նա։
