Մահափորձ` ռուս գեներալ-լեյտենանտի դեմ. նա հոսպիտալացվել է

Մոսկվայում գեներալ-լեյտենանտ Վլադիմիր Ալեքսեևի դեմ մահափորձ է կատարվել, ՌԻԱ Նովոստիին հայտնել է Քննչական կոմիտեի մամուլի խոսնակ Սվետլանա Պետրենկոն։

«Քննիչների տվյալներով՝ փետրվարի 6-ին Մոսկվայի Վոլոկոլամսկոյե մայրուղու վրա գտնվող բնակելի շենքում դեռևս անհայտ անձը մի քանի կրակոց է արձակել տղամարդու վրա և փախել դեպքի վայրից։ Տուժածը հոսպիտալացվել է քաղաքային հիվանդանոցում», - ասել է նա։

Գեներալի վրա կրակած տղամարդը դեռևս որոնվում է։ Քննիչները և դատաբժշկական փորձագետները ուսումնասիրում են տեսախցիկների տեսագրությունները և հարցաքննում ականատեսներին։

Հարուցվել է քրեական գործ՝ սպանության փորձի և զենքի ապօրինի շրջանառության հատկանիշներով։