Իրանում ԱՄՆ դեսպանատունն արտակարգ հայտարարություն է տարածել

Իրանում ԱՄՆ վիրտուալ դեսպանատունը արտակարգ հայտարարություն է տարածել՝ կոչ անելով ԱՄՆ քաղաքացիներին հնարավորինս արագ հեռանալ երկրից՝ անվտանգության լուրջ ռիսկերի պատճառով։

Դեսպանատան կայքում հրապարակված հայտարարության մեջ նշվում է, որ ԱՄՆ քաղաքացիներին խորհուրդ է տրվում անհապաղ լքել Իրանը։ Հայտարարությունում որպես հնարավոր տարբերակ նշվում է նաև ցամաքային ճանապարհով դուրս գալը՝ Թուրքիայի կամ Հայաստանի ուղղությամբ, եթե դա անվտանգ է տվյալ պահին։

Դեսպանատան տվյալներով՝ երկրում ընթացող բողոքի ակցիաները կարող են վերաճել բռնության, ինչը կարող է հանգեցնել ձերբակալությունների և մարմնական վնասվածքների։ Նշվում է, որ Իրանում ուժեղացվել են անվտանգության միջոցառումները, փակվում են ճանապարհներ, արձանագրվում են տրանսպորտի և ինտերնետի աշխատանքի խափանումներ։

Բացի այդ, սահմանափակվել է կապի հասանելիությունը, իսկ մի շարք ավիաընկերություններ չեղարկում կամ կրճատում են իրենց չվերթները, ինչը բարդացնում է երկրից դուրս գալու հնարավորությունները։