Թրամփը Ալիևին և Փաշինյանին անվանել է «իսկապես լավ առաջնորդներ»

ԱՄՆ նախագահ Դոնալդ Թրամփը Վաշինգտոնում անցկացված Ազգային աղոթքի նախաճաշի ժամանակ բարձր է գնահատել Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի դերը տարածաշրջանային խաղաղության գործընթացում՝ նրանց անվանելով «իսկապես լավ առաջնորդներ»։

Ելույթ ունենալով միջոցառման ընթացքում՝ Թրամփը հերթական անգամ անդրադարձել է իր մասնակցությանը մի շարք միջազգային հակամարտությունների կարգավորման գործընթացներին։ Նրա խոսքով՝ ԱՄՆ-ի միջնորդությամբ հնարավոր է եղել լարվածության նվազեցում և երկխոսության հաստատում տարբեր տարածաշրջաններում։

«Ես մասնակցել եմ բարդ և երկարատև հակամարտությունների կարգավորմանը, այդ թվում՝ Կամբոջայի և Թաիլանդի, Կոսովոյի և Սերբիայի, Պակիստանի և Հնդկաստանի, Իսրայելի և Իրանի, ինչպես նաև Հայաստանի և Ադրբեջանի միջև»,- նշել է ԱՄՆ նախագահը։

Խոսելով անցած տարվա օգոստոսի 8-ին կայացած Վաշինգտոնյան գագաթնաժողովի արդյունքների մասին, որի շրջանակում երեք երկրների ղեկավարները ստորագրել էին մի շարք կարևոր փաստաթղթեր, Թրամփը հատուկ ընդգծել է հայ և ադրբեջանցի առաջնորդների դերը։ Նրա խոսքով՝ երկու ղեկավարներն էլ երկար տարիներ գործել են հակամարտության պայմաններում, սակայն ի վերջո կարողացել են գնալ քաղաքական երկխոսության և համաձայնությունների ճանապարհով։