Ռուսաստանը կհարգի Հայաստանի ընտրությունը. Լավրով
Եվրամիությանն անդամակցությունն անհամատեղելի է Եվրասիական տնտեսական միությանը մասնակցության հետ, սակայն Ռուսաստանը կհարգի Հայաստանի ընտրությունը։ Այս մասին հայտարարել է ՌԴ արտաքին գործերի նախարար Սերգեյ Լավրովը, փոխանցում է ՌԻԱ «Նովոստին»։
«Եվրասիական տնտեսական միությանն անդամակցությունն անհամատեղելի է այն սկզբունքների հետ, որոնք ընկած են համագործակցությանը մասնակցելու և առավել ևս Եվրոպական Միությանը միանալու հիմքում։ Դա ձեր ընտրությունն է, և մենք այն լիովին կհարգենք»,– ասել է Լավրովը ՀՀ Ազգային ժողովի նախագահ Ալեն Սիմոնյանի հետ հանդիպման ընթացքում։
Լավրովը նաև նշել է, որ Եվրամիությունը Հայաստանին մշտապես կանգնեցնում է ընտրության առաջ՝ համագործակցել Ռուսաստանի կամ ԵՄ-ի հետ։
