Կան հարցեր, որոնց պատասխանները Երևանը դեռևս չի ստացել. Ալեն Սիմոնյանը` Լավրովին

Հայաստանն ու Ադրբեջանը հարաբերությունների կարգավորման գործընթացում լավ իմաստով բավական հեռուն են գնացել, և նախատեսվում է խաղաղության համաձայնագրի ստորագրում, ինչը շատ կարևոր է Հայաստանի ապագայի համար։ Այս մասին Մոսկվայում ՌԴ արտգործնախարար Սերգեյ Լավրովի հետ հանդիպման ընթացքում հայտարարել է ՀՀ Ազգային ժողովի նախագահ Ալեն Սիմոնյանը։

ԱԺ նախագահը նշել է, որ Հայաստանը շահագրգռված է Ռուսաստանի հետ հարաբերություններով և չի ցանկանում, որ Մոսկվայում ձևավորվի ընկալում, թե Երևանը Ռուսաստանի դեմ քայլեր է ձեռնարկում։ Միաժամանակ Սիմոնյանը ընդգծել է, որ կան հարցեր, որոնք անհրաժեշտ է քննարկել։

Անդրադառնալով ՀԱՊԿ-ին՝ Ալեն Սիմոնյանը նշել է, որ կան հարցեր, որոնց պատասխանները Երևանը դեռևս չի ստացել։

«Մեզ նաև անհանգստացնում է այն հռետորաբանությունը, որը մենք հաճախ լսում ենք հանրային դաշտում:Դա անհանգստացնում է նաև Հայաստանի հանրությանը»,– ասել է Սիմոնյանը՝ հավելելով, որ հասարակությունը շատ բացասաբար է արձագանքում Մոսկվայից հնչող հայտարարություններին, քանի որ Մոսկվան դաշնակից է և կարևոր Հայաստանի համար։

Խոսելով ԵԱՏՄ-ից՝ ԱԺ նախագահը կարծիք է հայտնել, որ Հայաստանը չպետք է դուրս գա Միությունից, և հնարավոր է գտնել լուծում, որը շահավետ կլինի երկու կողմերի համար։