Իրանի ԱԳ նախարարը նշել է միջուկային գործարքի շուրջ ԱՄՆ-ի հետ բանակցությունների ժամանակն ու վայրը
Իրանի և ԱՄՆ-ի միջև բանակցությունները կկայանան փետրվարի 6-ին Օմանի մայրաքաղաք Մասկատում։ Այս մասին հայտնել է Իրանի արտաքին գործերի նախարար Աբբաս Արաղչին։
«ԱՄՆ-ի հետ միջուկային խնդրի շուրջ բանակցությունները նախատեսված են ուրբաթ օրը՝ մոտ ժամը 10:00-ին, Մասկատում։ Շնորհակալ եմ մեր օմանցի եղբայրներին՝ բոլոր անհրաժեշտ կազմակերպչական հարցերը ապահովելու համար»,- գրել է Արաղչին X սոցիալական հարթակում։
Իրանի ԱԳ նախարարը չի հստակեցրել բանակցությունների ձևաչափը։
Axios-ի հաղորդմամբ՝ ի սկզբանե հանդիպումը պետք է կայանար Ստամբուլում՝ Մերձավոր Արևելքի երկրների ներկայացուցիչների մասնակցությամբ։ Սակայն փետրվարի 3-ին Թեհրանը դիմել է բանակցությունները Օման տեղափոխելու առաջարկով՝ պահանջելով, որ դրանք լինեն բացառապես երկկողմ և նվիրված միայն միջուկային ծրագրի շուրջ քննարկումներին։
