Հայաստանը չի կարող միաժամանակ լինել և՛ ԵՄ-ի, և՛ ԵԱՏՄ-ի անդամ. Օվերչուկ

Եվրոպական Միության փոփոխվող բնույթը, որը տնտեսական բլոկից վերածվում է ռազմաքաղաքական միության, պետք է հաշվի առնվի, երբ Հայաստանը որոշում կայացնի միանալ ԵՄ-ին։ Այս մասին հայտարարել է Ռուսաստանի փոխվարչապետ Ալեքսեյ Օվերչուկը, ըստ ՏԱՍՍ-ի։

Նրա խոսքով՝ ինտեգրացիոն միավորման ընտրությունը միշտ մնում է հայ ժողովրդինը։ Օվերչուկը ընդգծել է, որ ԵՄ բնույթն այսօր փոխվում է, և միությունը ձեռք է բերում ռազմաքաղաքական միության բնութագրեր, որը «ագրեսիվորեն տրամադրված է Ռուսաստանի նկատմամբ»։

«Հայերը պատրա՞ստ են միանալ ռազմաքաղաքական միությանը, որն այսօր շատ ագրեսիվորեն է տրամադրված Ռուսաստանի Դաշնության նկատմամբ։ Հնարավոր է՝ հայերը նույնպես ստիպված լինեն իրենց այս հարցը տալ», - նշել է Օվերչուկը։

Նա նաև հայտարարել է, որ ԵՄ-ին Երևանի անդամակցության վերաբերյալ պաշտոնական բանակցությունների գործընթացը կարող է տևել «շատ տարիներ»։ Նա նաև նշել է, որ Հայաստանը չի կարող միաժամանակ լինել և՛ ԵՄ-ի, և՛ ԵԱՏՄ-ի անդամ, ինչպես նախկինում հայտարարել էր վարչապետ Նիկոլ Փաշինյանը։

«Եթե նման ընտրություն երբևէ կատարվի, այն կլինի համապարփակ՝ հաշվի առնելով այն դինամիկան, որը մենք այսօր տեսնում ենք Եվրամիության փոփոխվող բնույթում», - ասաց Օվերչուկը։