Էրդողանը շնորհավորել է Փաշինյանին և Ալիևին

Թուրքիայի նախագահ Ռեջեփ Էրդողանը շնորհավորել է Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին 2026 թվականի «Զայեդ» մարդկային եղբայրության մրցանակին արժանանալու կապակցությամբ։

Էրդողանը ողջունել է թե՛ Իլհամ Ալիևի, թե՛ Նիկոլ Փաշինյանի ջանքերն ու ցուցաբերած վճռական կամքը՝ տևական խաղաղության հաստատման ուղղությամբ։

Թուրքիայի նախագահը վստահություն է հայտնել, որ կողմերի կողմից համաձայնեցված խաղաղության համաձայնագրի ուժի մեջ մտնելուց հետո Հարավային Կովկասի համար նոր փուլ կսկսվի։

Նրա խոսքով՝ Անկարան անկեղծորեն աջակցում է բոլոր նախաձեռնություններին, որոնք միտված են տարածաշրջանում և աշխարհում անվտանգության, խաղաղության, բարեկեցության և կայունության ամրապնդմանը։

Նշվում է նաև, որ մի շարք երկրների ղեկավարներ, այդ թվում՝ Ղազախստանի, Ուզբեկստանի և Ղրղզստանի նախագահները, ինչպես նաև Պակիստանի վարչապետն ու Լիբանանի նախագահը, շնորհավորել են Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին «Զայեդ» մարդկային եղբայրության մրցանակին արժանանալու կապակցությամբ։