Ալեն Սիմոնյանը Մոսկվայում հանդիպել է Վալենտինա Մատվիենկոյի հետ. մանրամասներ

Պաշտոնական այցով Մոսկվայում գտնվող ՀՀ Ազգային ժողովի նախագահ Ալեն Սիմոնյանը փետրվարի 5-ին հանդիպել է Ռուսաստանի Դաշնության Դաշնային ժողովի Դաշնության խորհրդի նախագահ Վալենտինա Մատվիենկոյի հետ։

Հանդիպման ընթացքում զրուցակիցները քննարկել են երկկողմ օրակարգին վերաբերող հարցերի լայն շրջանակ՝ քաղաքական, տնտեսական, կրթական և մշակութային ոլորտներում՝ առանձնակի ուշադրություն դարձնելով միջխորհրդարանական համագործակցության զարգացմանը։ Կողմերը շեշտել են, որ խորհրդարանական կապերը կարևոր դեր ունեն Հայաստանի և Ռուսաստանի միջև հարաբերությունների ամրապնդման գործում։

Առանձին անդրադարձ է կատարվել օտարերկրյա քաղաքացիների վերաբերյալ ՌԴ օրենսդրության մեջ կատարված միգրացիոն կանոնների փոփոխություններին։ Քննարկվել են հատկապես դեպի Ռուսաստան բեռնափոխադրում իրականացնող հայ վարորդների համար առաջացած խնդիրները և դրանց կարգավորման ուղղությամբ ձեռնարկվող քայլերը։

Զրույցի ընթացքում կողմերը անդրադարձել են նաև Հայաստանի և Ադրբեջանի միջև խաղաղության գործընթացին, ինչպես նաև տարածաշրջանային հետաքրքրություն ներկայացնող այլ հարցերի։ Հանդիպման ավարտին Ալեն Սիմոնյանը և Վալենտինա Մատվիենկոն պատասխանել են լրագրողների հարցերին։