ԱՄՆ-ն քննարկում է Վենեսուելայի կրիպտոակտիվների բռնագրավման հարցը
ԱՄՆ իշխանությունները քննարկում են Վենեսուելային վերագրվող խոշոր կրիպտոակտիվների հնարավոր բռնագրավման կամ սառեցման տարբերակը, հայտնում է CNBC-ն՝ հղում անելով աղբյուրներին։ Խոսքը վերաբերում է գաղտնի պահեստի մասին տեղեկություններին, որտեղ, ըստ հրապարակման, կարող է պահվել մինչև 600 հազար բիթքոյն։
Նշվում է, որ այդ ակտիվները, ենթադրաբար, ձևավորվել են նավթի և ոսկու վաճառքից, ինչպես նաև USDT ստեյբլքոյնի գործարքներից ստացված միջոցներով՝ միջազգային պատժամիջոցների շրջանցմամբ։ Հրապարակման մեջ ընդգծվում է, որ ներկայացված տվյալները պաշտոնապես չեն հաստատվել Վենեսուելայի կամ ԱՄՆ իշխանությունների կողմից։
Վերլուծաբանների գնահատմամբ՝ եթե նման ծավալի կրիպտոակտիվներ սառեցվեն և երկար ժամանակ դուրս մնան շրջանառությունից, դա կարող է ազդել շուկայի վրա։ Մասնավորապես նշվում է, որ այդ դեպքում ժամանակավորապես կարող է հասանելի չլինել բիթքոյնի ընդհանուր շրջանառվող առաջարկի շուրջ 3 տոկոսը։
Մասնագետները չեն բացառում, որ նման սցենարը կարող է ազդեցություն ունենալ բիթքոյնի գնի դինամիկայի վրա, սակայն շուկայի հնարավոր արձագանքը կախված է բազմաթիվ գործոններից և ներկայումս մնում է վերլուծական գնահատումների մակարդակում։
