Մադուրոյի դեմ դատավարությունը կսկսվի ոչ շուտ, քան 2027 թվականին․ Bloomberg
Վենեսուելայի նախագահ Նիկոլաս Մադուրոն այսօր ներկայանալու է ԱՄՆ դատարան՝ նախնական դատական լսման շրջանակում։
Bloomberg-ի փոխանցմամբ՝ առաջիկա նիստը լինելու է բացառապես ձևական բնույթի։ Դատարանը կընթերցի ներկայացված մեղադրանքները, կսահմանի նախնական միջնորդությունների ժամանակացույցը և կքննարկի խափանման միջոցի հարցը։
Ըստ պարբերականի՝ Մադուրոյի ազատ արձակումը գրավի դիմաց համարվում է քիչ հավանական։ Միաժամանակ նշվում է, որ գործի նյութերի ծավալն ու իրավական բարդությունը ենթադրում են երկարատև նախապատրաստական փուլ։
Աղբյուրների գնահատմամբ՝ գործի բուն քննությանը դատարանը կանցնի միայն մի քանի տարի անց, և դատավարության ակտիվ փուլը կարող է սկսվել ոչ շուտ, քան 2027 թվականին։
