Առողջական խնդիրներ ունենալը կամ բանակից ազատվելն ինչպես է ազդում վարորդական իրավունքի վրա․ ՆԳՆ-ն պարզաբանում է

Auroranews.am-ի հարցին, թե արդյոք Ներքին գործերի նախարարությունը դիտարկում է այնպիսի կարգավորում, որի համաձայն՝ զինվորական ծառայությունից ազատված կամ ծանր առողջական խնդիրներ ունեցող անձինք չեն կարողանա վարորդական իրավունք ստանալ, ՆԳՆ-ից պարզաբանել է Պարեկային ծառայության պետի տեղակալ Արման Չիլինգարյանը:

«Տրանսպորտային միջոցներ վարելու իրավունքին խոչընդոտող հիվանդությունների ցանկը հստակ սահմանված է օրենսդրությամբ։ Խոսքը վերաբերում է այն հիվանդություններին, որոնք համարվում են վարելու հակացուցում, սահմանափակում կամ պահանջում են հատուկ պայմաններ։

Եթե անձը զինվորական ծառայությունից ազատվել է այնպիսի հիվանդության հիմքով, որը միաժամանակ ներառված է վարորդական իրավունք ստանալուն խոչընդոտող հիվանդությունների ցանկում, ապա նա չի կարող ստանալ վարորդական վկայական։

Միևնույն ժամանակ, կարող են լինել հիվանդություններ, որոնց պատճառով անձն ազատվում է զինվորական ծառայությունից, սակայն դրանք չեն խոչընդոտում վարորդական իրավունք ստանալուն։ Այդ դեպքում անձը կարող է ստանալ վարորդական վկայական։

Հնարավոր է նաև հակառակ իրավիճակը, երբ հիվանդությունը հիմք չէ զինվորական ծառայությունից ազատվելու համար, սակայն այն բացառող հանգամանք է վարորդական իրավունք ստանալու տեսանկյունից։ Իսկ այն դեպքերում, երբ հիվանդությունը միաժամանակ հանդիսանում է և՛ զինվորական ծառայությունից ազատվելու, և՛ վարորդական իրավունք ստանալուն խոչընդոտող հիմք, տվյալ անձը չի կարող ստանալ վարորդական վկայական»,- ասել է։