Ի՞նչ կա զարմանալու, ասել են՝ վենդետա լինելու է ու սաղին նստացնելու եմ, դա էլ անում են. Շարմազանովը

«Ի՞նչ կա զարմանալու, ասել են՝ վենդետա լինելու է ու սաղին նստացնելու եմ, դա էլ անում են»,– գրել է ՀՀԿ ԳՄ անդամ Էդուարդ Շարմազանովը՝ անդրադառնալով երկրում ընթացող քաղաքական և իրավական զարգացումներին։

Նրա խոսքով՝ պետք չէ անակնկալի գալ, երբ ընտրություններին զուգահեռ կամ դրանցից հետո «ռեժիմը անցնում է ռեպրեսիաների նոր փուլի»։

Շարմազանովը նշել է, որ, իր գնահատմամբ, իշխանություններին և նրանց արտաքին գործընկերներին անհրաժեշտ է «կառավարվող քաղաքական դաշտ՝ առանց Արարատի խորհրդի, առանց Արցախի հիշատակման, առանց Ցեղասպանության ճանաչման, կարճ ասած՝ առանց Անկախության հռչակագրի բովանդակության»։

Նրա պնդմամբ՝ ընդդիմության հավաքած ձայները խանգարում են այդ գործընթացին, և իշխանությունը շարժվում է իր և իր «արտաքին գործընկերների» նախանշած ուղղությամբ՝ «Հայաստանն առանց պատմական կաղապարների» գաղափարի ներքո։

Շարմազանովը նաև քննադատել է ընդդիմության գործողությունները՝ նշելով, որ միայն դատապարտելով հնարավոր չէ արդյունքի հասնել, իսկ փողոցային պայքարի գործիքը, ըստ նրա, բավարար չափով չի կիրառվում։

Նա ընդգծել է, որ միջազգային կառույցները, ըստ իր գնահատականի, չեն արձագանքում ներքաղաքական զարգացումներին, և հիշեցրել է նախկին ընտրությունների արդյունքների շուրջ իր դիրքորոշումը։

Իր խոսքում ՀՀԿ ԳՄ անդամը նաև նշել է, որ ընդդիմադիր դաշտում որևէ ուժ միայնակ չի կարող իշխանափոխություն իրականացնել՝ հավելելով, որ իրենք պատրաստ են սահմանափակ հնարավորություններով մասնակցել ընդդիմադիր պայքարին՝ առանց քաղաքական ամբիցիաների։

Շարմազանովը հայտարարել է, որ դատապարտում է իր գնահատմամբ՝ «ապօրինություններն ու քաղաքական հետապնդումները», սակայն ընդգծել է, որ միայն դատապարտելը բավարար չէ իրավիճակը փոխելու համար։