Ռուսական հարվածներից հետո ԵՄ-ն նոր աջակցություն է խոստանում Ուկրաինային

Եվրահանձնաժողովի ղեկավար Ուրսուլա ֆոն դեր Լեյենը Կիևին ԱԹՍ-ների արտադրության համար նոր միջոցներ է խոստացել այն բանից հետո, երբ Ռուսաստանի զինված ուժերը հարվածներ հասցրին անօդաչուներ արտադրող ուկրաինական ձեռնարկություններին։

Այս մասին նա հայտնել է իր Իքս-ի էջում։ 

«Անցյալ շաբաթ մենք տրամադրեցինք առաջին 4 միլիարդ եվրոն 90 միլիարդ եվրոյից՝ անօդաչու թռչող սարքերի առաջատար տեխնոլոգիաների հաշվին Ուկրաինայի պաշտպանությունն ուժեղացնելու համար։ Շուտով ավելին կստացվի»,- նշել է նա։ 

Բացի այդ,  Ուրսուլա ֆոն դեր Լեյենը  խոստացել է «ինտենսիվորեն աշխատել պատժամիջոցների 21-րդ փաթեթի վրա» և Անկարայում կայանալիք ՆԱՏՕ-ի գագաթնաժողովում, որտեղ ինքը հրավիրված է, բարձրացնել Ուկրաինայի համար հակաօդային պաշտպանության հարցը։