Ադրբեջանի տարածքով Ռուսաստանից Հայաստան կհասցվի պրոպան գազ

Ադրբեջանական ԶԼՄ-ների հաղորդմամբ՝ Ռուսաստանից Հայաստան պրոպան գազի նոր խմբաքանակ է տեղափոխվելու Ադրբեջանի տարածքով տարանցիկ եղանակով, այս մասին փոխանցում են ադրբեջանական լրատվամիջոցները: 

Մասնավորապես, այսօր Բալաջարի կայարանից նախատեսվում է ուղարկել 30 վագոն ռուսական պրոպան գազ՝ ուղղված Հայաստան։ Տեղեկությունը տարածել է ԱՊԱ գործակալությունը։

Նշվում է, որ սա տարանցիկ մատակարարումների շարունակական գործընթացի մի մասն է։ Ավելի վաղ հաղորդվել էր, որ Ադրբեջանի տարածքով արդեն Հայաստան է տեղափոխվել զգալի ծավալի տարբեր բեռներ, այդ թվում՝ ավելի քան 14 հազար տոննա դիզելային վառելիք և 4 հազար տոննայից ավելի AI-92 և AI-95 մակնիշի բենզին։

Բացի այդ, հաղորդվում է, որ մինչ այժմ Ադրբեջանի տարածքով տարանցիկ եղանակով Ռուսաստանից Հայաստան է փոխադրվել նաև ավելի քան 34 հազար տոննա հացահատիկ, մոտ 8 հազար տոննա պարարտանյութ, 133 տոննա ալյումին, 68 տոննա հնդկացորեն և 414 տոննա անտրացիտ։

Ադրբեջանական կողմի հրապարակումներում ընդգծվում է, որ նման տարանցիկ փոխադրումները իրականացվում են գործող լոգիստիկ պայմանավորվածությունների շրջանակում։