Ռուսաստանը մշակում է Starlink արբանյակների դեմ նոր զենք․ հետախուզական զեկույց
Associated Press-ի հաղորդմամբ՝ ՆԱՏՕ-ի երկրների հետախուզական ծառայությունները մտահոգված են Ռուսաստանի նոր հակաարբանյակային ծրագրով:
Ռուսաստանը կարող է մշակել նոր տեսակի հակաարբանյակային զենք, որը նպատակ ունի ոչնչացնել կամ շարքից հանել Starlink արբանյակային համակարգը։
Զեկույցի համաձայն՝ երկու արևմտյան հետախուզական կառույցներ կասկածում են, որ Մոսկվան աշխատում է այսպես կոչված «զոնալ ազդեցության» զենքի վրա, որը նախատեսված է ուղեծրում ավերիչ բեկորների ամպեր ստեղծելու համար։ Նման մեխանիզմը կարող է միաժամանակ վնասել կամ շարքից հանել Starlink համակարգի բազմաթիվ արբանյակներ։
Հետախուզական տվյալների համաձայն՝ զենքը կարող է Starlink-ի ուղեծրերը լցնել հարյուր հազարավոր բարձր խտությամբ մետաղական հատիկներով (գրանուլներով)։ Դրանք, բախվելով արբանյակներին, կարող են լուրջ վնաս հասցնել տեխնիկային։
Միևնույն ժամանակ, փորձագետները զգուշացնում են, որ նման քայլը կարող է հանգեցնել նաև լայնածավալ և անկանխատեսելի հետևանքների՝ վտանգի տակ դնելով այլ երկրների և ընկերությունների ուղեծրային համակարգերը։
