Բաքվին քննադատող ռեպորտաժ․ Լեհաստանի դեսպանը կանչվել է ԱԳՆ

Բաքվում Լեհաստանի դեսպան Պավել Ռադոմսկին կանչվել է Ադրբեջանի արտաքին գործերի նախարարություն, որտեղ նրան բողոքի նոտա են հանձնել TVP World-ով հեռարձակված հանրապետության մասին քննադատական ​​ռեպորտաժի կապակցությամբ։ Այդ մասին հաղորդում է Ադրբեջանի արտաքին գործերի նախարարության մամուլի ծառայությունը։

Ռեպորտաժը վերաբերում է «Արևելյան ճեպընթաց» հաղորդմանը, որը օգոստոսի 26-ին հեռարձակվել է լեհական անգլալեզու հանրային հեռուստաալիքով TVP World-ում։ Հեռարձակողի X-ում հրապարակման համաձայն՝ հաղորդումը քննարկել է Ադրբեջանի ներքաղաքական իրավիճակը, այդ թվում՝ հիշատակել առանձին լրագրողների ձերբակալությունները և մեղադրել ընդդիմադիր ակտիվիստների հետապնդման մեջ։

Ադրբեջանի արտաքին գործերի նախարարությունը հայտարարել է, որ լեհական հեռուստահաղորդումը պարունակում է «կողմնակալ և բացարձակապես անընդունելի հայտարարություններ, որոնք ուղղված են ադրբեջանական պետության և երկրի ղեկավարության դեմ»։ Այն նաև ուշադրություն է հրավիրել հաղորդման ընթացքում հաղորդավարի սադրիչ վարքագծի վրա:

Արտգործնախարարությունը Լեհաստանի կառավարության կողմից ֆինանսավորվող TVP հեռուստաալիքով Ադրբեջանի մասին բացասական նյութերի տարածումը գնահատել է որպես «անբարյացակամ քայլ, որը հակասում է երկու երկրների միջև գործընկերության ոգուն և կարող է լուրջ վնաս հասցնել երկկողմ հարաբերություններին»։

«Լեհական կողմին կոչ արվեց անհապաղ և արդյունավետ միջոցներ ձեռնարկել՝ Ադրբեջանի դեմ նման սադրիչ արշավները դադարեցնելու համար», - հայտարարել է Բաքուն։