Ռուս-ուկրաինական պատերազմի ավարտը դեռ հեռու է. Ռումինիայի նախագահ
Ռուսաստանի և Ուկրաինայի միջև պատերազմի ավարտը դեռևս հեռու է, նույնիսկ ԱՄՆ Սպիտակ տան կողմից իրականացվող խաղաղ նախաձեռնությունների պայմաններում։ Այս մասին Politico-ին տված հարցազրույցում հայտարարել է Ռումինիայի նախագահ Նիկուշոր Դանը։
Նրա խոսքով՝ կարճաժամկետ հեռանկարում ավելի շատ պատճառներ կան հոռետես լինելու, քան լավատես։ Ռումինիայի նախագահը նշել է, որ Ռուսաստանի նախագահ Վլադիմիր Պուտինը, ըստ երևույթին, ներկայումս շահագրգռված չէ խաղաղությամբ։
«Թվում է՝ Պուտինը կարծում է, որ երկու-երեք ամիս անց ձեռք բերված խաղաղությունն իր համար ավելի շահավետ կլինի, քան հիմա։ Այդ պատճառով նրանք կշարունակեն կռվել, քանի որ որոշակի առաջընթաց ունեն ռազմաճակատում»,- ընդգծել է Դանը։
Նա նաև նշել է, որ ցանկացած խաղաղության համաձայնագիր, որի շրջանակում ագրեսորը ինչ-որ ձևով պարգևատրվում է, վտանգավոր է Եվրոպայի և գլոբալ անվտանգության ապագայի համար։
