Մթություն, սառնություն և անջատումներ․ ինչ է տեղի ունեցել Օդեսայում գիշերը

Ռուսաստանի կողմից իրականացված գիշերային հարձակման հետևանքով Օդեսայում վնասվել է կարևորագույն ենթակառուցվածքային օբյեկտ։ Արդյունքում քաղաքի մի շարք հատվածներ մնացել են առանց ջրամատակարարման, էլեկտրաէներգիայի և ջեռուցման։

Ամենաշատը տուժել է Պերեսիպսկի շրջանը, որտեղ, ըստ քաղաքային իշխանությունների, անջատումները ընդգրկել են բնակելի թաղամասեր։ Գրանցվել են նաև բնակելի շենքերի վնասումներ, ինչի հետևանքով բազմաթիվ քաղաքացիներ ձմռան պայմաններում հայտնվել են առանց տարրական կենսապայմանների։

Քաղաքապետարանի տվյալներով՝ իրավիճակը բարդ է, և համապատասխան ծառայությունները աշխատում են վնասների վերացման ուղղությամբ։ Միաժամանակ նշվում է, որ անվտանգության նկատառումներից ելնելով Օդեսայի մի շարք դպրոցներ մասնակիորեն անցնում են հեռավար ուսուցման։