Սա պատերազմի սկիզբ չէ, սա վրեժխնդրության հռչակագիր է․ ԱՄՆ զինված ուժեր

ԱՄՆ զինված ուժերը  հարվածներ են հասցրել Սիրիայում «Իսլամական պետություն» (ԻՊ) խմբավորման թիրախներին՝ ի պատասխան Պալմիրայում անցյալ շաբաթ սիրիական-ամերիկյան պարեկախմբի վրա իրականացված հարձակման, որի հետևանքով զոհվել էր երեք ամերիկացի։ Այս մասին հայտնում է bbc.com-ը։

ԱՄՆ պաշտպանության նախարար Փիթ Հեգսեթը X սոցիալական հարթակում գրել է, որ «Բազեի հարված» գործողության շրջանակում հարվածներն ուղղված են եղել «Իսլամական պետության զինյալներին, ենթակառուցվածքներին և զենքի օբյեկտներին»։

«Սա պատերազմի սկիզբ չէ, սա վրեժխնդրության հռչակագիր է։ Այսօր մենք որսացինք և սպանեցինք մեր թշնամիներին։ Նրանցից շատերին։ Եվ մենք կշարունակենք»,- հավելել է Հեգսեթը։

ԱՄՆ նախագահ Դոնալդ Թրամփը TruthSocial սոցիալական ցանցում իրականացված գործողությունն անվանել է «շատ լուրջ պատասխան հարված»։

Հավելենք՝ Դոնալդ Թրամփը Սպիտակ տանը հյուրընկալել է Սիրիայի ժամանակավոր նախագահ Ահմեդ ալ-Շարային։ Հանդիպումից հետո Սիրիան միացել է «Իսլամական պետության» դեմ պայքարող 88 երկրներից բաղկացած միջազգային կոալիցիային։