ԵՄ-ն Հայաստանից չի պահանջում այն, ինչ պահանջում է Վրաստանից․ վարչապետ
Եվրոպական Միության երկակի վերաբերմունքը Վրաստանի նկատմամբ ամոթալի է, լրագրողների հետ զրույցում հայտարարել է Վրաստանի վարչապետ Իրակլի Կոբախիձեն։ Այս մասին տեղեկացնում է APA լրատվական գործակալությունը։
Վարչապետի խոսքով՝ եվրոպական բյուրոկրատիան ուղղակիորեն պահանջում է, որպեսզի Վրաստանը միանա Ռուսաստանի դեմ սահմանված պատժամիջոցներին։
«2022 թվականին մենք իրականացրինք մի շարք պարզ հաշվարկներ և պարզեցինք, որ պատժամիջոցներին միանալը կարող է առաջացնել առնվազն 10 տոկոս տնտեսական անկում։ Այդ պատճառով մենք ընդունեցինք որոշում, որը համապատասխանում էր մեր ազգային շահերին», - նշել է Կոբախիձեն։
Նա նաև հիշեցրել է, որ եվրոպական բյուրոկրատիան նման պահանջներ չի ներկայացրել Մոլդովային, Հայաստանին կամ այլ երկրներին։
«Այստեղ նույնպես առկա են կրկնակի ստանդարտներ։ Որոշ երկրների վարչապետներ կարող են Եվրոպայից Մոսկվա թռչել։ Մենք դեմ չենք. դա տվյալ երկրների ներքին գործն է։ Սակայն այն, ինչ ընդունելի է որոշների համար, մյուսների դեպքում կարող է կտրուկ բացասական արձագանք առաջացնել», - ասել է Վրաստանի վարչապետը։
