ԱՄՆ-ն ու Եվրոպան համաձայնեցրել են Ուկրաինայի անվտանգության երաշխիքները

ԱՄՆ-ն և եվրոպական երկրները Ուկրաինայի նախագահ Վլադիմիր Զելենսկու հետ Բեռլինում կայացած բանակցությունների ընթացքում համաձայնության են եկել Ուկրաինայի անվտանգության երաշխիքների հիմնական ուղղությունների շուրջ։ Այս մասին հայտնում է The New York Times-ը՝ հղում անելով իր աղբյուրներին։

Ըստ հրապարակման՝ համաձայնեցված մոտեցումները ներառում են Ուկրաինայի զինված ուժերի (ԶՈւ) հետագա ուժեղացումը, ինչպես նաև եվրոպական երկրների զինված ստորաբաժանումների հնարավոր տեղակայումը Ուկրաինայի տարածքում։ Բացի այդ, նախատեսվում է ընդլայնել ամերիկյան հետախուզական տվյալների օգտագործումը՝ Կիևի պաշտպանունակությունը բարձրացնելու նպատակով։

The New York Times-ի աղբյուրների փոխանցմամբ՝ քննարկվող անվտանգության երաշխիքները դիտարկվում են որպես Ուկրաինայի համար երկարաժամկետ կայունության ապահովման գործիք՝ հատկապես խաղաղ կարգավորման հնարավոր գործընթացի շրջանակում։