Ուկրաինայի վերակառուցման համար՝ Եվրամիությունը չի կարողանա վճարել․ Մարթա Կոս

Եվրամիությունը չի կարողանա միայնակ վճարել Ուկրաինայի վերականգնման համար․ կպահանջվի մասնավոր ընկերությունների միջոցների ներգրավում։ Այս մասին հայտարարել է ընդլայնման հարցերով եվրահանձնակատար Մարթա Կոսը՝ ԵՄ ԱԳ նախարարների հանդիպման ժամանակ։

«Մենք այժմ Ուկրաինայի համար ֆինանսավորման համաձայնեցման փուլում ենք։ Բայց Ուկրաինայի վերականգնումն անհնար կլինի առանց մասնավոր միջոցների ներգրավման։ Եվրահանձնաժողովին անհրաժեշտ է անվտանգ ներդրումային միջավայր Ուկրաինայում, բոլորը պետք է հավատան, որ Ուկրաինայում ներդրումներ կատարելը վտանգավոր չէ: Հակակոռուպցիոն միջոցառումներն անհրաժեշտ են հենց դրա համար», - հայտարարել է Կոսը՝ մեկնաբանելով Ուկրաինայում կոռուպցիոն սկանդալները։

Եվրահանձնաժողովի ներկայացրած ծրագրի համաձայն՝ ԵՄ-ում սառեցված շուրջ 210 մլրդ եվրոյի չափով ռուսական ակտիվները նախատեսվում է օգտագործել Ուկրաինայի ընթացիկ ծախսերը հոգալու համար 2026–2027 թվականներին՝ ռազմական գործողությունների շարունակման, ինչպես նաև խաղաղության հաստատման դեպքում՝ բանակի վերականգնման նպատակով։