Հունվարի 1-ից կենսաթոշակների և նպաստների վճարման նոր կարգ կգործի
ԱԺ հանձնաժողովում առաջին ընթերցմամբ քննարկվել է պետական նպաստների և կենսաթոշակների վերաբերյալ օրենքների փոփոխությունների նախագծերի փաթեթը։
Նախագծի ընդունման անհրաժեշտությունը պայմանավորված է 2026 թվականի հունվարի 1-ին և դրանից հետո ընտանիքում ծնված երրորդ և յուրաքանչյուր հաջորդ երեխայի համար 50 000 դրամ աջակցություն նշանակելու ու վճարելու շարունակականության ապահովմամբ, երեխայի ծննդյան միանվագ նպաստի չափի համահարթեցմամբ, ինչպես նաև իրավակիրառ պրակտիկայում ի հայտ եկած խնդիրների լուծմամբ։
Կառավարության հեղինակած ««Պետական նպաստների մասին» օրենքում փոփոխություններ և լրացումներ կատարելու մասին» և ««Պետական կենսաթոշակների մասին» օրենքում փոփոխություններ կատարելու մասին» օրենքների նախագծերի փաթեթը առաջին ընթերցմամբ քննարկվել է ՀՀ Ազգային ժողովի աշխատանքի և սոցիալական հարցերի մշտական հանձնաժողովի նիստում։
ՀՀ աշխատանքի և սոցիալական հարցերի նախարարի տեղակալ Դավիթ Խաչատրյանը ներկայացնելով նախագծերի փաթեթով նախատեսվող իրավական կարգավորումները՝ առաջարկել է կողմ քվեարկել օրենսդրական նախաձեռնությանը։ Նա տեղեկացրել է, որ հունվարի 1-ից Կառավարությունը կհաստատի կենսաթոշակների և նպաստների վճարման նոր կարգ, որի համաձայն՝ 2026 թվականի ապրիլի 1-ից բոլոր վճարումները կիրականացվեն անկանխիկ եղանակով։
