Հայաստանը կարևոր է Եվրամիության համար․ Ռումինիայի ԱԳ նախարար

Հայաստանի հետ համագործակցության ընդլայնման լայն հնարավորություններ կան՝ ուղղված երկրի կայունության և կենսունակության ամրապնդմանը։ X-ի իր միկրոբլոգում այս մասին գրել է Ռումինիայի արտաքին գործերի նախարար Օանա-Սիլվիա Ցոյուն։

Նրա խոսքով՝ ԵՄ արտաքին գործերի նախարարների խորհրդի նիստերում հանգամանալից մտքերի փոխանակություն է տեղի ունեցել Հայաստանի արտաքին գործերի նախարար Արարատ Միրզոյանի, ինչպես նաև ԵՄ արտաքին գործերի մյուս նախարարների հետ։

«Ընդգծվեց, որ Հայաստանը կարևոր է Եվրամիության համար։ Առկա են համագործակցության ընդլայնման լայն հնարավորություններ՝ Հայաստանի կայունության և կենսունակության ամրապնդման նպատակով։ Աջակցություն հայտնեցինք Հարավային Կովկասում կայուն խաղաղության և բարգավաճման հաստատմանն ուղղված բոլոր ջանքերին»,- գրել է Ցոյուն։

Նա նշել է նաև, որ երկկողմ մակարդակում Ռումինիան կշարունակի աշխատանքը Հայաստանի հետ հարաբերությունների հետագա զարգացման ուղղությամբ։