Ռուսաստանը զգուշացնում է Լեհաստանին․ այդ քայլն անհետևանք չի մնա․ Զախարովա
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտնել է, որ Մոսկվան ակնկալում է՝ Լեհաստանում կվերագնահատեն Ուկրաինայի դիմումով ներկայացված մեղադրանքների հիմնավորվածությունը՝ կապված ռուս գիտնական Ալեքսանդր Բուտյագինի ձերբակալության հետ։ Նրա խոսքով՝ ուկրաինական կողմը Բուտյագինին վերագրում է մշակութային ժառանգության ոչնչացման մեղադրանք։
Դիվանագետն ընդգծել է, որ նման «քաղաքականացված գործողությունները» հեռանկար չունեն և անհետևանք չեն մնա, և Լեհաստանը պետք է հասկանա դա։
Նա հավելել է, որ Լեհաստանում Ռուսաստանի դեսպանության աշխատակիցները հանդիպել են Բուտյագինին և կապի մեջ են նրա պաշտպանությամբ զբաղվող փաստաբանի հետ, որը վիճարկում է դատարանի կայացրած ժամանակավոր կալանքի որոշումը։
Հավելենք՝ լեհական RMF FM-ը հաղորդել էր, որ լեհական հետախուզական ծառայություններն, Ուկրաինայի խնդրանքով, ձերբակալել են ռուս հնագետ Ալեքսանդր Բուտյագինին, որը Էրմիտաժ թանգարանի աշխատակից է, որը ենթադրաբար պեղումներ էր անցկացնում Ղրիմում:
Վարշավայի դատարանը հնագետի նկատմամբ որպես նախնական կալանք նշանակել է 40 օր, և սպասվում է նրա արտահանձնման պաշտոնական դիմումը՝ Կիևից։ Բուտյագինի կողմից կատարված հանցագործությունը նախատեսում է մեկից տասը տարի ազատազրկում։
Ավելի վաղ Կրեմլը հայտարարել էր , որ ռուս գիտնականի Լեհաստանում կալանավորումը կամայական գործողություն է։
