Բաքուն Հայաստանի հետ սահմանին երկաթուղային կապի վերականգնման հարցն է քննարկում․ ԶԼՄ
Գործող տարանցիկ քաղաքականության շուրջ վերջին քննարկումներից հետո Ադրբեջանում սկսել են ուսումնասիրել Հայաստանի ուղղությամբ բեռնափոխադրումների այլընտրանքային հնարավորությունները։ Minval Politika-ի հետ զրուցած աղբյուրների տեղեկացմամբ՝ Բաքուն նախաձեռնել է նախնական գնահատում՝ դիտարկելով խորհրդային տարիներին գործած Բաքու–Ղազախ երկաթուղային հատվածի վերականգնումը մինչև Հայաստանի սահմանային գոտի։
Նշվում է, որ Խորհրդային տարիներին կար երկաթուղի, որը կապում էր Բաքուն Ղազախի հետ, այնուհետև շարունակվում էր դեպի Իջևան: Բաքուն ներկայումս քննարկում է այս հատվածի վերականգնման հարցը՝ ներկայիս Ղազախից մինչև Հայաստանի հետ ենթադրյալ սահմանը:
Կայքի տեղեկություններով՝ նախնական գնահատումն արդեն սկսվել է. ուսումնասիրվում են այս հատվածի հնարավոր վերականգնման տեխնիկական պարամետրերը, ծախսերը և ժամանակացույցը։
Միաժամանակ, ուսումնասիրվում է լիարժեք ավտոմոբիլային երթուղիների տարբերակը։ Երթուղին դեռևս վերջնականապես որոշված չէ. քննարկվում են այլընտրանքային միջանցքները և դրանց տնտեսական կենսունակությունը։ Սակայն այն փաստը, որ նման քննարկումներ են տեղի ունենում, խոսում է գլխավորի մասին. Ադրբեջանը դադարել է Վրաստանի տարածքով տարանցումը դիտարկել որպես միակ կամ անխուսափելի ուղի։
Ըստ նույն տեղեկությունների՝ դիտարկվում է նաև խաչմերուկային ավտոմոբիլային երթուղիների ձևավորումը։ Քննարկումները դեռևս ընթացքի մեջ են, և վերջնական ընտրություն չի արվել, սակայն գնահատվում է տնտեսական արդյունավետությունը և հնարավոր ծանրաբեռնվածությունը։
Հավելենք՝ Վրաստանը նախկինում հայտարարել էր, որ մաքսատուրք չի գանձի ադրբեջանական նավթամթերքի առաջին տարանցման համար դեպի Հայաստան։ Սակայն երկարաժամկետ տուրքերի և մաքսային քաղաքականության հարցերը կողմերի միջև շարունակում են մնալ քննարկման փուլում։ Նոր նախաձեռնությունների ուսումնասիրությունը ցույց է տալիս, որ տարածաշրջանում տրանսպորտային սխեմաները կարող են փոփոխվել՝ կախված տնտեսական և լոգիստիկ հաշվարկներից։
