Հնդկաստանը էներգակիրներ է գնում՝ ելնելով իր ազգային շահերից․ ԱԳՆ-ն՝ Ռուսաստանից նավթ ներմուծելու մասին

Հնդկաստանը էներգակիրներ է գնում՝ ելնելով իր ազգային շահերից և համաշխարհային նավթի շուկայում տիրող իրավիճակից: Այս մասին ճեպազրույցի ժամանակ հայտարարել է Հնդկաստանի արտաքին գործերի նախարարության խոսնակ Ռանդհիր Ջայսվալը՝ պատասխանելով այն հարցին, թե արդյոք Հնդկաստանի կառավարությունը պլանավորում է դադարեցնել Ռուսաստանից նավթի ներմուծումը:

«Մենք հետևողականորեն հետևում ենք այն քաղաքականությանը, որը բազմիցս հստակեցրել ենք։ Էներգիայի մատակարարումները կախված են համաշխարհային շուկայի դինամիկայից, ինչպես նաև 1.4 միլիարդ մարդուն մատչելի էներգիա մատակարարելու անհրաժեշտությունից», - ասել է նա։

Դիվանագետը նաև հավելել է, որ հնդկական մասնավոր ընկերությունները նավթի մատակարարումների վերաբերյալ որոշումներ են կայացնում առևտրային առաջարկների հիման վրա, որոնք կախված են նաև համաշխարհային նավթային շուկայի դինամիկայից։

Հավելենք՝ ԱՄՆ-ն լրացուցիչ 25% մաքսատուրք է սահմանել Նյու Դելիի վրա ռուսական էներգետիկ արտադրանքի գնման համար: Հնդկական ապրանքների և ծառայությունների մաքսատուրքերը բարձրացվեցին մինչև 50%: Հնդկաստանի արտաքին գործերի նախարարությունը այս գործողությունները անարդար է անվանել: