Դատարանը մերժել է Գրիգորի Խաչատուրովին կալանավորելու միջնորդությունը
«Իշխանություն» լրատվականին հայտնի է դարձել, որ Հակակոռուպցիոն դատարանի դատավոր Սարգիս Պետրոսյանը մերժել է քննիչի միջնորդությունը՝ Գեներալ-մայոր Գրիգորի Խաչատուրովի նկատմամբ կալանքը կիրառելու վերաբերյալ։ Դրանով պայմանավորված՝ նրա նկատմամբ միջազգային հետախուզում չի հայտարարվել։
Ըստ աղբյուրի՝ Խաչատուրովը ներկայում գտնվում է Մոսկվայում և Հայաստան կարող է վերադառնալ միայն իր կամքով։ Այդ իրավիճակում մեղադրյալին միջազգային հետախուզում հայտարարել հնարավոր չէ, սակայն նա պարտավոր է ինքնուրույն ներկայանալ վարույթն իրականացնող մարմնին։
Գրիգորի Խաչատուրովին մեղադրանք է առաջադրվել 2021 թվականից քննվող քրեական գործից վերջերս առանձնացված մասով՝ ՀՀ ՔՕ 436-րդ հոդվածի 1-ին մասով (կաշառք տալը մի խումբ անձանց կողմից նախնական համաձայնությամբ) և 549-րդ հոդվածի 3-րդ մասով (իշխանազանցություն կամ իշխանության չարաշահում, որն անզգուշությամբ առաջացրել է մարդու առողջությանը ծանր վնաս)։
