Արդարադատության փոխնախարարը՝ Սահմանադրության նախաբանից հռչակագրին հղումը հանելու մասին
Արդարադատության փոխնախարար Տիգրան Դադունցը «Ազատության» հետ զրույցում ասել է, որ Նոր Սահմանադրության տեքստի ուղղությամբ աշխատանքները շարունակվում են, սակայն խորհրդում դեռ չի քննարկվել Անկախության հռչակագրի հարցը։ Նրա խոսքով՝ ձևակերպումների մակարդակով ներկայումս առաջարկ չկա, և քննարկումը նախատեսվում է ավելի ուշ, երբ թեման ներկայացվի խորհրդին։
Փոխնախարարը նշեց, որ խորհրդում հարցի վերաբերյալ կարող են լինել տարբեր կարծիքներ, քանի որ այն ներառում է տարբեր ոլորտների մասնագետների։ «Կտեսնենք քննարկումների արդյունքը», — հավելել է նա։
Հարցին, թե ինչն է հիմք լինելու հռչակագրին հղումը պահպանելու կամ հանելու վերաբերյալ մոտեցման համար, Դադունցը պատասխանել է, որ վարչապետի հրապարակային դիրքորոշումը նույնպես կարևոր է, քանի որ խորհուրդը ստեղծվել է վարչապետի որոշմամբ, և նրա առաջարկած հարցերը պետք է քննարկվեն։
Դադունցը նաև նշեց, որ թեմաների մեծ մասը խորհրդին ներկայացնում է Արդարադատության նախարարությունը, սակայն խորհրդի անդամները նույնպես կարող են առաջարկել հարցեր։ «Շատ հնարավոր է, որ այդ փուլին հասնենք, բայց այս պահին որոշում չկա», — ասել է նա։
Նրա խոսքով՝ խորհրդում յուրաքանչյուր հարց դրվում է քվեարկության, և տեքստը հաստատվում է խորհրդի կողմից։ Հարցին, թե տեքստի ստեղծման ժամանակ հաշվի կառնեն վարչապետի դիրքորոշումը, փոխնախարարը նշեց, որ անտեսել այն չեն կարող, քանի որ նախարարությունը գործադիր իշխանության մասն է։ Միաժամանակ ընդգծել է, որ եթե լինեն այլ առաջարկներ խորհրդի անդամներից, դրանք նույնպես կքննարկվեն և դրվեն քվեարկության։
