Հոնկոնգում զոհերի թիվն աճում է

Հոնկոնգի հյուսիսում գտնվող Wang Fuk Court բնակելի համալիրում տեղի ունեցած խոշոր հրդեհի հետևանքով զոհերի թիվը հասել է 44-ի, հարյուրավոր մարդիկ դեռևս համարվում են անհայտ կորած։

Հոնկոնգի իշխանությունները հայտնել են երեք անձի ձերբակալության մասին՝ կասկածյալներին մեղադրելով հրդեհելով անուղղակի սպանության մեջ։

Ոստիկանությունից տեղեկացրել են, որ ձերբակալվածները՝ 52-ից 68 տարեկան տղամարդիկ, աշխատում են այն շինարարական ընկերությունում, որը շենքում իրականացնում էր վերանորոգման աշխատանքներ։ Դրանցից երկուսը ընկերության ղեկավարներ են, մյուսը՝ խորհրդատու-ինժեներ։

Իշխանությունները հայտարարել են, որ շենքերի արտաքին կողմում հայտնաբերվել են նյութեր, որոնք, ամենայն հավանականությամբ, հրդեհակայուն չեն եղել։

«Մենք հիմքեր ունենք ենթադրելու, որ ընկերության ղեկավարությունը դրսևորել է կոպիտ անփութություն, ինչը հանգեցրել է այս ողբերգությանը և առաջացրել կրակի անկառավարելի տարածում՝ հանգեցնելով լայնածավալ աղետի»,- հայտարարել է ոստիկանության ներկայացուցիչը։

Հրդեհը, որը պատել էր ութ բարձրահարկ շենքերից յոթը, մարել է ավելի քան 700 հրշեջ։ Ողբերգությունից հետո հաջորդ առավոտյան հրշեջները դեռևս փորձում էին մարել մի քանի օջախներ։

Հրդեհի պատճառը դեռևս անհայտ է. այն բռնկվել է այն ժամանակ, երբ համալիրում ընթանում էին վերանորոգման աշխատանքներ։

Հինգշաբթի առավոտյան Հոնկոնգի վարչության ղեկավար Ջոն Լին հայտարարել է, որ անհայտ կորած է համարվում 279 մարդ, սակայն ավելի ուշ հրշեջները տեղեկացրել են, որ կապ են հաստատել նրանցից մի մասի հետ։ Ավելի քան 900 մարդ ժամանակավոր ապաստան է գտել։