Բրյուսելի օդանավակայանում չեղարկվել են գրեթե բոլոր չվերթները՝ շարունակվող գործադուլի պատճառով
Բելգիայում համազգային գործադուլի երրորդ օրը, Բրյուսելի օդանավակայանում չեղարկվել են գրեթե բոլոր չվերթները, իսկ հասարակական տրանսպորտի աշխատանքը զգալիորեն խաթարվել է, հայտնում է Reuters-ը:
Գործադուլը կազմակերպվել է երկրի գլխավոր արհմիությունների կողմից և նպատակ ունի ճնշում գործադրել վարչապետ Բարտ դե Վևերի գլխավորած կոալիցիոն կառավարության վրա։ Ակցիայի մասնակիցները բողոք են հայտնում կառավարության առաջարկած բարեփոխումների դեմ, որոնք առնչվում են կենսաթոշակների և աշխատաշուկայի ոլորտներին։
Բրյուսելի օդանավակայանը չեղարկել է բոլոր ելքային չվերթները, նաև մուտքային 110 չվերթ՝ պլանավորված 203-ից։ Բելգիայի մյուս խոշոր օդանավակայանը՝ Շառլերոն, նույնպես տեղեկացրել է աշխատանքի զգալի խափանումների մասին։
Գործադուլի վերջին օրը նաև սպասվում են խոշոր խափանումներ դպրոցների, հասարակական տրանսպորտի և մասնավոր հատվածի գործունեության ոլորտներում։
