Փաշինյանը և Տոկաևն ընդունել են համատեղ հայտարարություն
Հայաստանի վարչապետ Նիկոլ Փաշինյանը և Ղազախստանի նախագահ Կասիմ-Ժոմարտ Տոկաևը Աստանայում կայացած բանակցությունների արդյունքում ընդունել են համատեղ հայտարարություն։
Երկկողմ բանակցություններից հետո ստորագրվել են մի շարք համաձայնագրեր, այդ թվում՝ գաղտնի տեղեկությունների փոխանցման, օգտագործման, պաշտպանության և պահպանման, ինչպես նաև երկու երկրների դիվանագիտական ներկայացուցչությունների շենքերի կառուցման համար հողամասերի փոխադարձ տրամադրման վերաբերյալ։ Կողմերը հաստատել են նաև Հայաստանի և Ղազախստանի միջև առևտրատնտեսական համագործակցության 2026-2030 թթ. ճանապարհային քարտեզը։
Ստորագրվել են փաստաթղթեր բարձր տեխնոլոգիական արդյունաբերության, տնտեսության, առողջապահության, մշակույթի, գիտության և կրթության ոլորտներում նախարարությունների և գերատեսչությունների համագործակցության վերաբերյալ։
Նշվում է, որ նոյեմբերի 20-ին ՀՀ վարչապետ Նիկոլ Փաշինյանը պաշտոնական այցով ժամանել է Ղազախստան, իսկ նոյեմբերի 21-ին տեղի են ունեցել նրա բանակցությունները Ղազախստանի նախագահ Կասիմ-Ժոմարտ Տոկաևի հետ։
