Կաշառքով վարորդական քննություններ. մեղադրանքներ են ներկայացվել 20 անձի

ՀՀ հակակոռուպցիոն կոմիտեում քննվող քրեական վարույթով իրականացված օպերատիվ-հետախուզական միջոցառումների և ապացուցողական գործողությունների արդյունքում հիմնավորվել է, որ ՀՀ ՆԳՆ Տավուշի մարզի հաշվառման-քննական բաժնի պետի պաշտոնը զբաղեցրած անձը, օգտագործելով իր լիազորություններն ու ազդեցությունը, տարբեր անձանց օժանդակությամբ մեկ տասնյակից ավելի քաղաքացիներից ստացել է ընդհանուր 5.830.000 դրամ կաշառք՝ վարորդական վկայական ստանալու նպատակով ձևական տեսական և գործնական քննություններ կազմակերպելու համար։ Կաշառքի չափը յուրաքանչյուր դեպքում կազմել է 200.000-ից 550.000 դրամ։

Պարզվել է, որ նա նախնական համաձայնության է եկել նույն բաժնի մեկ այլ պաշտոնատար անձի հետ՝ վարորդական վկայական ստանալու համար դիմած քաղաքացիների համար ձևական քննություններ անցկացնելու շուրջ։ Վերջինս բաժնի պետի դրդմամբ մի շարք անձանցից ընդունել է ձևական տեսական քննություններ՝ քննասենյակից դուրս գտնվող տեխնիկական միջոցներով միանալով համակարգիչներին և մատնացույց անելով հարցերի ճիշտ պատասխանները։

Նախաքննությունը ցույց է տվել, որ մեղադրյալները «օբյեկտիվ» քննության պատրանք ստեղծելու նպատակով մի շարք դեպքերում նախ նշանակել են բացասական գնահատականներ, ապա ՀՀ կառավարության որոշման պահանջները խախտելով՝ կազմակերպել երկրորդ քննություն և տվել դրական արդյունք, ինչի հիմքով տրամադրվել են վարորդական վկայականներ։

Տավուշի մարզի հաշվառման-քննական բաժնի պետին մեղադրանք է ներկայացվել ՀՀ քրեական օրենսգրքի 435-րդ հոդվածի 2-րդ մասի 3-րդ կետով (16 դրվագ), 435-րդ հոդվածի 2-րդ մասի 2-րդ և 3-րդ կետերով, 441-րդ հոդվածի 2-րդ մասի 4-րդ կետով (11 դրվագ) և 46-445-րդ հոդվածի 1-ին մասով (13 դրվագ)։ Նույն բաժնի պաշտոնատար անձին մեղադրանք է առաջադրվել ՀՀ քրեական օրենսգրքի 441-րդ հոդվածի 2-րդ մասի 4-րդ կետով (11 դրվագ) և 445-րդ հոդվածի 1-ին մասով (13 դրվագ)։ Երկուսին էլ որպես խափանման միջոց կիրառվել է կալանք։

Մեղադրանքներ են ներկայացվել նաև ՆԳՆ պաշտոնյաներին օժանդակած և նրանց կաշառք տված ևս 20 անձի։ Նրանցից 13-ի մասով նախաքննությունն ավարտվել է, և գործերը մեղադրական եզրակացությամբ ուղարկվել են ՀՀ հակակոռուպցիոն դատարան։

ՀՀ հակակոռուպցիոն կոմիտեն տեղեկացնում է, որ վերահսկում է վարորդական վկայականների տրամադրման գործընթացների օրինականությունը ՆԳՆ բոլոր հաշվառման-քննական բաժիններում և զգուշացնում է, որ յուրաքանչյուր կոռուպցիոն դրսևորում ստանալու է օրենքով նախատեսված քրեաիրավական գնահատական։ Քաղաքացիներին հորդորվում է վարորդական վկայական ստանալ օրենքով սահմանված կարգով և առերևույթ հանցանքի մասին տեղեկությունների դեպքում դիմել կոմիտե։