Հայաստան–Ղազախստան լոգիստիկ կապերը պետք է զարգացնել. Մհեր Գրիգորյան
Ղազախստանում լրագրողների հետ զրույցում ՀՀ փոխվարչապետ Մհեր Գրիգորյանը նշել է, որ լոգիստիկ լուծումները վկայում են մեծ ներուժի մասին, որը անհրաժեշտ է բացահայտել։ Նրա խոսքով՝ «Հայաստան-Ղազախստան և՛ առևտրային հարաբերությունները, և՛ նաև տրանզիտ պոտենցիալը շատ մեծ են, և դրանք պետք է օգտագործվեն»։
Փոխվարչապետը շեշտել է, որ այլընտրանքային լոգիստիկ ուղիների, այդ թվում՝ երկաթուղային և օդային, ստեղծումը կարևոր խթան կդառնա տնտեսական կապերի ակտիվացման համար։ Գրիգորյանը հավելել է, որ միջազգային առևտրում լոգիստիկ ծախսերն ու հնարավորությունները մեծ նշանակություն ունեն, և Ղազախստանի հետ նոր լուծումներ որոնելը Հայաստանին լայն հնարավորություններ է տալիս։ Օրինակով նշվել է ցորենի ներկրումը, որը ցույց է տվել այլընտրանքային մատակարարումների կարևորությունը։
Խոսելով Հայաստանի կառավարության առաջ քաշած «Խաղաղության խաչմերուկ» նախաձեռնության մասին՝ Գրիգորյանը վերահաստատել է դրա լուրջ տարածաշրջանային նշանակությունը՝ ընդգծելով, որ «անհնարին է, որ «Խաղաղության խաչմերուկը» մեծ լոգիստիկ նշանակություն չունենա մեծ ռեգիոնալ իմաստով»։ Նրա խոսքով՝ Ղազախստանը նույնպես լինելու է այս նախաձեռնության շահառուներից։
Փոխվարչապետը նշել է, որ Նիկոլ Փաշինյանի պաշտոնական այցի շրջանակում Հայաստանը և Ղազախստանը պատրաստվում են ստորագրել մեկ տասնյակից ավելի փաստաթղթեր, որոնց տնտեսական բովանդակությունն զգալի նշանակություն է ունենալու։
